بقلمى: فهمى محمود حجازى
قابلت كتير وعطيت الحب بدون تفكير
وفاتح قلبي للوارد بكل الخير
ورسمت الفرحة فى عيوني تسر الغير
وانا اللي الدمع جوه عيوني
كأن جفوني غطا على بير
وكاتم فيً آلامي لحد خطير
وعايش كل أحلامي أشوف الفرحة عند الغير
وصافي النية مش تعلب وعندي ضمير
لا أنا قاسي ولا أرنب ولكن قلبي زي الطير
عايش ع الفطرة والمبدأ
ومهما كان بيتدبر مكايد
ليً مش هيأس هكمل سير
ومادام الرب متكفل وهو وكيل
أنا الكسبان ومش هخسر
لأن القلب لسه أخضر وخيره وفير
