افتح بيبان الذكرى
بدرى ابوخزيم
افتح بيبان الذكرى جواك
لا الذكرى بتعدى ولا الأحزان بتنساك.
وإن حد سألك ايه اللي كان جواك..؟!!
بتداري روح تبكي وتبكيك..
حبل الجراح ملفوف على عنيك..
هتشوف ازاي.لون الفرحه وهو مغميك
يااللي انت ساكن بين شفايفك ناي.
ماشي تلملم الجراح من دروبك..
الحزن عمره..ما كان توبك..
طب ليه..عنيك مغرقة توبك..؟!!
ليه ضحكتك مكسوفة تقول و تتكلم..؟!!
بيعدى فرحك..حتى ما يسلّم..
والحزن فيك علّم ورسم خطوط على وشك وعلم
فتح عينيك الضحكة حواليك..
دا مين اللي عاشق دمعته غيرك..؟!!
ايد الحياة ممدودة لك..
وانت اللي حابس في الهموم طيرك.
افتح بيبان الذكرى جواك
واتصالح على الحاجات الحلوه فيك
