بقلم : عبير التميمى .
عشان متفرحش تانى لما حد يقول عليك ” خلبوص ” ..
وانت متخيل انه بيقول عليك واد شاطر ومقطع السمكة وديلها ومفيش زيك، فتمشى ف الشارع زى الطاووس نافش ريشك ..
يا عزيزى ..
الخلبوص فى بداية القرن ال 18 كان صبى الغازية 💃 .. شخص اجرودى مفيش شعر ف جسمه كان بيلبس زى الغازية ، ويضرب ع الصاجات ، ويقلد حركاتها اللى كلها إبتذال ، ويهرج مع ده ويغمز لده ويهمس لده بشكل إباحى ومستفز ، ويهيئ الجو والقاعدة والمزاج ، وف الغالب كان له جملة شهيرة بيرددها علشان يحمى الغازية من الحسد ” 4 و 1 عليكى يا أبلتى ”
إتكلم عنه علماء الحملة الفرنسية وقالوا ” الخلبوص مهرج يقوم بأوضاع بالغة الفحش وبحركات وقحة تواكب حركات الغازية “.. بدأ ببدلة رقص من سنين طويلة وبعدها لبس الجلابية الضيقة ، ومع الزمن والتطور واكب الموضة ولبس البدلة والكرفتة .. أشهر الخلابيص كان تركى واسمه عبد الله رقص 40 ليلة فى احتفالات افراح انجال الخديوى اسماعيل ، وشهرته نافست الحامولى والمظ وساكنة بك.
وأول ما فتحت دور السينما بعض الدور جابوا الخلابيص وخلوهم يروجوا للأفلام وقطعوا تذاكر .. على أساس ان عندهم موهبة فى الجذب وكده.. عرفناهم ع الشاشة من خلال افلام شفيقة ومتولى وسيد درويش والراقصة والسياسى .. وكل فيلم فيهم أظهر مرحلة زمنية معينة فى تطور الخلبوص .
نصيحة من اخ .. بلاش تفرح لو حد قال عليك ” خلبوص ” .. صدقنى عيب اوى .. والله عيب. 😁😁😁
