الشط التاني

كتبت ليلى رزق
على الشط التاني واقف بعيد
طفل لابس لبس العيد
كل يوم احن إليه من جديد
وانده عليه ..
ياقمر ياللي واقف بعيد
تعالى حضن قلبي مستنيك
حضن ام وحبيبه ..
كفايه طالت عليا الغيبه
ليه الدنيا معانا عنيدة ؟
تفرحنا ساعه وتجرحنا يوم العيد
وكأن كل شيء فيها له تمن
حتى لقاء مع القمر ..
طيب كلمه عنه أو خبر
عايش سعيد ؟ ..
فرحان بيوم العيد
وناسيني .. ناسي الغريبه
ناسي اللي كانت الحبيبه
ولا فاكرني …
وفاكر كل كلمه مني
وحبه اللي غالبني
مغلوبه أنا في هواه
مغلوبه وازاي أنساه
يامين يدلني على طريق
امشي فيه ويكون ليا صديق
ومع كل خطوه تقع مني ذكرى
كلمه في يوم قالها لي
فرحه في يوم رسمها لي
وحروف اسمه كمان
ياريتني انسى .. انسى
انسى حتى عنواني
انسى اسمي وزماني
واعيش في الدنيا رحاله
لا فاكره حب ولا خيانه
لقمه بسيطة تكفيني ..
وشربه ميه تهنيني
ولا في الدنيا شيء يعنيني
حتى اللي على الشط التاني