كتب / رزق ملاك شفيق
قصيده الشاعر الكبير / احمد سنجر
واليكم بعض من الأبيات من القصيده الجميله

عدت علينا سنين وسنين ولسه بنحتفل بيها
طلعت شمس النهار ومكنش فيه إختيار
ولاعندنا أسرار ولاحاجة نخفيها
كل الحكاية ارض والارض عندنا عرض
علشان مصريين وبروحنا نفديها
كان قائد عظيم وف قراره كان حكيم
حقق بنفسه وشاف وأخد القرار ولا خاف
وكل خطو حسبها قبل ما يخطيها
ولادنا كانوا ناويين وع النصر مصممين
وقالوا فرصة وجت والله ما نفرط فيها
وكانوا علي ميعاد قالوا حى ع الجهاد
وقالوا تمام يا فندم قال ع البركة ياولاد
أصلهم مش جنود دول كانوا وتد وعامود
بيسد عين الشمس يتحدى أي بلاد
وفي رمضان وقبل صلاة العصر
ربك جاب بإرادته النصر
والكل رافع راسه دكتور ومعلم وفلاح بفاسه
وكل الأمة العربية كرمتها عادت ليها
وبعد ما عدونا عرف قوتنا وحجمنا
قولنا نعمل سلام مش ضعف ده كرم مننا
وبالمعاهدة والمناهدة وبمكر الديابة
رجعنا كل شبر من سينا لحد طابا
وكل العالم شاف شعب وجيشه عمره ماخاف
دولة عنيدة حدودها بعيدة مش لسه وليدة
وبتقهر كل اللي يدبر او حتى في خيانة يفكر
وكل غازى وجه يرازى او حتى يحاول يعاديها
من ٧٣ لحد السنة اللي إحنا فيها والسنين اللي بعديها
ربي ذكرها في القرآن ولحد يوم الدين هو اللي حاميها
لا منظمات إرهاب ولا جيل تالت ولا رابع يقدر عليها
بلد الهرم والنيل والازهر منارة علي للي بيدرس فيها
قالوا عليها عمود الخيمة وهى الشمس بعد الغيمة
وهى الحصن والامان للي ف يوم يستنجد بيها
قالوا عليها شقيقة وكبري بلد الثقافة والاوبرا
وكنايس ومعابد ياما وتلت أثار العالم فيها
دولة عريقة مبتقعش وجيشها صلب مبيركعش
وشعب عنيد وقت الازمة مبيسالش
لو حتى م الجوع بيموت
قالها زمان الشيخ زايد ومكنش مبالغ او بيزايد
مصر لو تمرض يوم كل بلاد الأمة تموت

Loading

By hanaa

رئيس مجلس إدارة جريدة الاوسط العالمية نيوز