بقلم الكاتب: محمد عباس
الإسماعيلية
ناس ماتت وناس عايشه
وناس طيبه علي الفطره
وناس جافيه مع القسوه
مرار طافح وكله آهات
كلام غامض كلام حركات
وفي الواقع اكيد شعارات
وناس داست علي العشره
وناس عاشت بدون لازمه
بدون فايده بدون عايده
شرار وبارود نفوس قايده
وناس جواها نور وظلام
لكن عاشت علي الاوهام
خيال صامت مع الاحلام
وجوا قلوبها نبع حنان
وناس وجودها عمل كارثه
مآسي مرار بدون لازمه
وضاع الخير وفات ازمه
ويبقي في النفوس نكزه
وناس حياتها مش شايفه
نفوس تحقد لكن خافيه
وجوه تمكر بدون خفيه
لاليها ضمير تبان دافيه
حياتها صراع شرور عاليه
وناس باقيه حيطان مايله
ولاقايمه ولاعايمه
ولامرتاحه ولا نايمه
وناس اخده الحياه عافيه
تبان عميه تبان غيبه
تبان بارده تبان حاميه
لكن راضيه بروح ناميه
وناس امراضها مش كامنه
جبال نفقات مهيش كافيه
شروخ وافيه بروح بانيه
لكن عارفه الحياه فانيه
وناس لاضمير ولا بنيه
وناس غرورها في الثانيه
وناس بتعيش بدون غيه
وناس سالمه بدون نيه
بروح حانيه بدون ديه
وناس أحفاد كانت غاليه
ربيع احلامها في الدنيا
تعيش صافيه ولو ثانيه
قلوب نابضه بدون غيره
ايدين تنسج بميت حيله
وناس جاحده كما النيله
عماها شكوك بدون شيره
وناس تنصح بنور زاهيه
تقول معروف كاسات ساقيه
ولافي خوف ولا شاقيه
ولاتغرق في نار باقيه
وناس فاتت في ميت داهيه
هضاب ودهور بروح عاتيه
تفوت تنظر بعين باهيه
وناس باعت كما الميه
لكن سالت دموع شينه
وشالت في الكتاب سيره
وناس برواز في تصويره
شعور زائف وشوش عيره
لافي احساس ولاجيره
تبات سهران وفي غيره
تبات حيران بدون عيله
مصير محتوم بدون خيره