انا عايزك
محمد فوزى العليمى
انا عايزك ومش عايزك
ومش عايز اكون شبهك
ولكن انا عايز ارسمك
جوا عروقى وشرايينى
بأطيب مسك وعنبر
ولون ابيض على اخضر
وابخر بيكى أوجاع ى اشفي بيكى الاشواق
واجعلك حجاب شرعى
ومتغطى ومتوضى
وخرزه زرقه تحمينى
من السحره والكايدين
ولما يسألوا عنك هاقول
اختفت منى جوايا
لما زهقت من هروبى وسط الناس
وانا فى حقيقه الامر بهرب جواها
وهى مش حاسه.
علشان كده بقولكم تقولوا لها
انا مش عايزك
ولا ناوى اكون مثلك
وازاى اكون مثلك
وانا وانتى الأصل والصوره.
حقيقه بس مكسوره.
الكلمه ساعات …..
تكون باهته
.الالوان مهزوزة.
الصوت خافت
زى ضوء الغروب
فى أيام الشتا والبرد
.وانا محتاج دفا الفرن
فى شتويه وطبليه
ولما تلم الكل على كلمه حلوه
وتقليه تجمع الجيران ريحتها
وزغروده تلم فى الاحباب
اللى هجروا الدور
وسكنوا فى صناديق حجر
بلا روح.
انا مجروح ؟
ايوه والدوا فى الماضى
ولأنه استحاله يعود فأنا راضى
بريحته وبس فى روحها الطيبه
اللى تطبطب على كتف الجوع
وتسكت الزعلان بتصبيره
وتوزع الامل على الكل بدون تفريق
وتسقى العطشان من عشم بنسيم
وعيشه تصبح فل بس خليك صابر
.انا صابر لأن الصبر تمنه الجنه
.فخلينا نتمنى ذواده من صبر
وناخد حقنا بكره من ملك عادل.
ولان مفيش فى الدنيا عدل
فيبقى معادنا بالاخره
محمد فوزى العليمى
