مواطن مفروس
بسأل الفرارجى النهاردة عن سعر كيلو الفراخ البلدى فقال لى ب115 جنيه , فقلت ليه رافعين الأسعار ؟, مش خلاص أفرجوا عن العلف والدنيا ماشية , قال ليه يابيه : أنا كنت بشترى قفص الفراخ من المزرعة وزنه 25 كيلو ب1200 جنيه , النهاردة وصل ثمن نفس القفص 2850جنيه
وقبل ماعمل أى حاجة بخسر من وزن القفص 400 جنيه , فسألته ليه ؟
قال : الفراخ قبل ماتتحمل بيتم وزنها وهى منقولة على العربية بتبقى مضطربة من حركة اهتزاز العربية , لكن أول ماتوصل عندى المحل وتاخد مكانها وتشعر بالأستقرار بتقوم “عاملة ببيي ” ودا طبعا بيقلل من وزنها اللى أشترتها بيه , وكل ببيي فرخة بتقف عليا ب4 جنيه خسارة .
وعلينا نحن الشعب المقهور تحمل هذا الغلاء ومعه البيبي أيضا .
وقلت لنفسى: معنى ذلك أن معاشى الذى يبلغ 2900 جنيه ( والذى لا أقبضه لأن يتم تحويله أولا بأول للبنك تحت حساب قرض ) طبقا لحسبة الفرارجى يساوى 725 ببيي لو تم قسمتها على 30 يوم يبقى الحساب 24 ببيي يوميا ” وبعض الكسور ” , وهو أقل من ثمن كيلو الفراخ اللى ب115 جنيه أى ب28 ببيي .
ولاحول ولاقوة إلا بالله , والحمد لله أولا وأخيرا ودائما .
