بقلم : د / مى محمد زكي
كتير من الناس بتستخدم مصطلحي”اضطراب نفسي”و”مرض نفسي”على إنهم معنى واحد،لكن الحقيقة إن بينهم فرق مهم،وفهم الفرق ده بيساعدنا نقلل الوصمة ونفهم نفسنا واللي حوالينا بشكل أدق.
أولًا:يعني إيه اضطراب نفسي؟
الاضطراب النفسي هو خلل في طريقة التفكير،أو المشاعر،أو السلوك،بيأثر على حياة الشخص اليومية،لكن من غير ما يكون بالضرورة مرتبط بتلف عضوي واضح في المخ.الاضطرابات النفسية بتظهر نتيجة تفاعل عوامل نفسية،واجتماعية،وتجارب حياتية ضاغطة،زي الصدمات،التربية،الضغوط المستمرة،أو أنماط تفكير غير صحية.
من أمثلة الاضطرابات النفسية:القلق،الاكتئاب،الوسواس القهري،اضطرابات الشخصية،واضطرابات ما بعد الصدمة.الشخص هنا غالبًا بيكون مدرك لمشكلته،وبيشتكي من معاناة داخلية،وبيقدر يتجاوب مع العلاج النفسي بشكل كبير.
ثانيًا:يعني إيه مرض نفسي؟
المرض النفسي بيكون مرتبط بشكل أوضح بخلل بيولوجي أو كيميائي في المخ،وبيأثر على الإدراك والواقع والحكم على الأمور.في الحالات دي،الشخص ممكن يفقد قدرته على التمييز أو الاستبصار،ويكون غير مدرك إنه مريض.
من أمثلة الأمراض النفسية:الفصام،الاضطراب الوجداني ثنائي القطب في نوباته الحادة،وبعض حالات الذهان.العلاج هنا بيعتمد أساسًا على الأدوية،مع دور مساعد للعلاج النفسي بعد استقرار الحالة.
الفرق الأساسي بينهم
الاضطراب النفسي غالبًا بيكون الشخص واعي بيه،وبيحس إنه تعبان وعاوز مساعدة،أما المرض النفسي ففيه خلل أعمق في الإدراك والوعي بالمرض.الاضطراب النفسي بيستجيب بدرجة كبيرة للعلاج النفسي،بينما المرض النفسي يحتاج علاج دوائي منتظم وأساسي.
نقطة مهمة لازم نفهمها
سواء كان اضطراب أو مرض نفسي،الاتنين مش ضعف إيمان،ولا قلة شخصية،ولا عيب.دي حالات إنسانية ليها أسبابها وعلاجها،وكل ما كان التدخل بدري،كل ما كانت فرص التحسن أفضل.
ختاماً
الفهم الصح للمصطلحات مش رفاهية،ده خطوة أساسية في طريق العلاج،وتقليل الخوف،ونشر الرحمة بدل الأحكام.الصحة النفسية زيها زي أي صحة تانية،تحتاج وعي،وعلاج،ودعم.
