مايسة إمام
هل هلاله وش جديد
طل علينا وجاب العيد
شق بنوره ضلام الليل
تم البدر بقى اسمه حفيد
قال:
رشوا الملح أوام. وارقوني
مـ الحساد قوموا غطوني
رددوا اسم الله يحميني
وللأغراب اوعوا تسيبوني
هاتوا غربال هاتوا ابريق
ايدوا الشمع خلوه بريق
دقوا الهون ادعوا يصون
ربكوا حالي في كل طريق
فين جدي يسمي ويدني
بالهمس يأدن لي في ودني
ويقول لي اكبر وساعدني
خايف شيبي تهددني
فين ستي تقول حلقاتك
اسمع كلمتي واسعدني
نور عيني يابن الغالي
بكره انت اللي هتشلني
ولو كنت بنت هاتوا لي
فستان مشغول باللولي
وعروسة تغني وترقص
وتقول سقفوا غنوا لي
من دلوقت تعالوا عدوا
كام عريس هيجولي
هاتوا لعب هاتوا مراجيح
هاتوا شرايط شعر يسيح
قولوا للصبح يقوم ويصيح
صلوا واملوا السما تسابيح
وادعوا يكون لساني فصيح
