عم نجيب

رؤيه بقلم .. مصطفي العموري

فينك بس يا عم نجيب ده انت واحشني وفين بتروح وفين بتغيب …. مالك فيه ايه ؟ وليه الناس زعلانه منك ؟ وليها ايام اللي بيغلط واللي يعيب …. واللي يدافع واللي يهاجم واللي يقاطع واللي مقابلك ب الاحضان و ب الترحيب ….
سامع الناس كانت بتقولك انت صعيدي اتلم شويه أو كده عيب …. وانك رديت وقولت بحرقه دي عالم جهله ضد التطوير وانا راح اكمل مهما تقولو واللي واخدني عدو فيه غيره واخدني حبيب …
وانا راجل وطني وكمان طول عمري رمز كبير ووجهه نظري لازم تتقدر م انتم عارفيني وحافظين سيرتي وعايش وسطيكم بقالي ايام وسنين …. وياكم طول عمري ومعاكم سري هو انا يعني عنكو غريب ….
قولت امتعكم ومش من جيبي م هي دي اموالكم وبدل اللقمه هوزع لحمه الكل هياخد اللي بعيد و اللي قريب …. اللي هياكل واللي هيسمع واللي هبنهش واللي بعينه بس يبص واهو كلو ذنوب …. هو انا يعني وبس اللي اكلي بقي معيوب ….
واللي رافضني ف ايده ريموت يبعد عني ومش هيموت وفيه غيري باعم كتيييير ولا حرام ان خدت انا يعني الترند يومين ؟؟؟ ولا الكل هيوصل عندي انا ويتوب !!! ….

ومعايه موافقه ومعايه تصاريح ومعايه الصفوه ومعايه الكل من المحاسيب …. وقالولي اكمل ده انت بتداوي المجاريح ومحدش قالي ابقي مليح او حتي خفيف وانا حر يا سيدي وراح اتمسك ومش هتراجع ولا راح افرط ولا لحقي يوم راح اسيب …. واللي معقد او قرفان او تعبان انا يا سيدي راجل اعمال منيش والله لحد طبيب ….

……. حبيبي انت ياعم نجيب
طول عمرك واضح وصريح .. واحنا اللي طلعنا ظالمينك و بتوع تلقيح …. طول عمرك انت ال لبلب واللي لسانك قدام المايك بيبقي فصيح …. احنا اللي نصحناك و قولنالك معلش ولم المفاضيح .. وانت اتاريك الصح واحنا ياسيدي المتخلفين بتوع الجهل ولا السحر ولا الشيح …. م احنا صحيح هنفهم ايه م هم حبايبك واللي معاك وواقفين جنبك فيهم القس وفيهم الشيخ …. وبياخدو نصيبهم اللي بياخدو حته لحمه واللي بياخدو فلوس سايله واللي عامله انها ناس نايمه او عميه والكل كفيف …. وبتسمع بس صوت التهليل والتصفيق ….

بس اسمحلي ياعمي اقولك وعارف اني مش من باقي اهلك بس يا سيدي اسمعني انا من دور ابنك ف اسمع مني قبل م تهلك متنساش روحك ومتنساش اهلك وان كنت يا سيدي نسيت اصلك بص لفوق هتلاقي ربك اللي هيبجي يوم ويحاسبك مهما كانت ياعمي ديانتك ….

لا دي عادتنا ولا تقاليدنا ولا ده التقدم اللي هيرفع يوم اسمك او هيخلينا بعد رحيلك ابدا نفتكرك
يا عم نجيب بص لسنك
يا عم نجيب اتقن عملك وسيبك منهم وراعي شغلك
وظف كام شاب او افتح مشاريع او شغل فقرا ياسيدي ف مصانعك
ركز بس انت ف عملك علشان يعلي ويدوم ذكرك ….

وسيبك م الفن ده مواله كبير وبقيت اخطائه والله كتير وضيعو والله بسببه شباب الجيل
ولا بقي فيه فن ولا تمثيل ..
سيبك م العيب يا عم نجيب وارجع لنفسك ارجع لرشدك حافظ ياسيدي ع وضعك وابني ف اسمك بدل م الناس تنسي اللحمه
وتيجي يوم م الجوع تاكلك ….