كتب _ عبدالرحمن شاهين
نظراً لكثرة انتشار الغش في المجمدات وكثرة الضبطيات من المجمدات الغير صالحة للاستهلاك الآدمي..
أحب انبه حضراتكم لكذا حاجه قبل الشراء ،،،
لو بتشتري مجمدات لحوم وخضار عليها عروض وتخفيضات لازم تخلي بالك من كذا حاجه قبل ماتشتري
معظم المحلات بتعمل كل فترة عروض مغرية علي بعض السلع الغذائية وخاصة المجمدات.
طيب ياريت تخلي بالك قبل ماتشتري أي عرض من العروض دي
لازم تتأكد من كذا حاجه منها:
- أتأكد إن تاريخ الصلاحية المكتوب على الكيس أو العبوة ساري و انه مش مكتوب باليد أو مكشوط أو مشطوب عليه.
- أتأكد إن تاريخ الصلاحية يناسبك وخاصة لأن مثلا لو تاريخ الصلاحية فاضل عليه شهر وينتهي
يبقي لازم حضرتك تشوف هتستخدمه خلال كام يوم علشان لو عدى الشهر من غير ماتستخدم المجمدات دي كدة صلاحيتها هتنتهي عندك ومش هتستفيد منها وهتبقي خسرت من ورا العرض بدل ما تستفيد منه - و بعد ماتتأكد من تاريخ الصلاحية المدون علي الكيس ،لازم تمسك الكيس كويس وتشوف شكل اللحوم من جوة أو الخضار مجمدة بطريقة صح ولا لأ..يعني لو فيه سائل مثلا واضح جوه كيس اللحمة أو الخضار.. فده دليل إن اللحوم والخضار دي مش مجمدة بطريقة صحيحة وأنه اتفك تجميدها كذا مرة ورجعت اتجمدت تاني وللأسف ده بيتسبب في فسادها وضياع قيمتها الغذائية.
وكمان بلاش تشتري أي كيس مجمدات مقطوع أو متهتك.
خليك مستهلك واعي وماتشتريش أي عرض قبل ما تتأكد إنك هتستفيد منه ولا يضر صحتك.
الدينامو
