للشاعر شحاته على ابودرب
شق جدار الواقع
و ارميني ف أرض خيال
ارميني لوحدي
من غير ماضي يقطّع فيا
من غير جرح ينز صديد
ارميني لوحدي بعيد
من غير وحمة ف قلبي
تقول أنا عاشقة وجودك
و بعد ما اصدق ضي وجودها
و اصدق إنها نجم سهيل
تفلت ايدها تجيب الليل
ارميني لوحدي
من غير ايد مش مني
تعاندني و تخلع كتفي
و تبعد عنّي
من غير نغمة حب جبانة
و قت ما انادي عليها تغيب
من غير مجداف كدّاب و منافق
قال هاينجّيني من بحر جنوني
و سابني ف موج عالى رهيب
اقلعني من كل جدوري السايبة
قطّع كل نسوري الدايبة
و ارميني ف اي تراب غريب
ارميني ف دنيا بدون الوان
كرهت الناس اللى بتتلون
عارف ايه اقذر الوان ؟
لون الكدب و لون الغش
لو الغدر و لون النم
و اكتر ناس يجيبوا الهم
اللى حياتهم لونها نفاق
شريان الصبح القادم ضاق
و المشوار بيقول انا لسه طويل
نَفسي خلاص بيهاجر صدري
زعَقت كل جوارحي
مش هانكمل ، مش هانكمل
الناس أوهام في حياتي
شوك نَبَت بالعكس
و أنا وجداني اتنسّل
أصبح مَهْري مش متحمل
ملعونة الكلمة الزيف
ملعون الحرف المايع
سراب بيمثل إنه شريف
و عنيه بتقول دا مخادع
أنا مش غرزة ف توب
بيداري جسد جزّار
عديم احساس
الدم بيكتب
اسم ضحايا كل جعان
و مصاب بسعار
تجريح الناس
أنا مش حلقة وصل
ما بين القاتل و المقتول
أنا مش فاصلة
ما بين الغادر و المغدور
و لا هابقى خط عبور
لمنافق بين ضحاياها
ولا هبقى خط تماس
ربي خلقني لوحدي كيان
كوكتيل أخلاق سمّاه (إنسان)
ميّزه بالعقل و بالإحساس
فانا مش هاقبل رقص الزار
و الميلان يمين و يسار
و انى اتلون زي الحيّة
عشان اعجبهم أو أرغّبهم
في صُحبة شمعة بنور ونّاس
ارميني لوحدي بعيد الناس
لا عايز ادوس ..
و لا عايز انداس
#شحاته_على_ابودرب
