ا
كتب: بسام عبد الخالق
“ميار” بنت مصرية عندها 23 سنة في رابعة طب أسنان دخلت مول سيتي ستارز إمبارح قبل المغرب وفضلت في المول لمدة 3 ساعات متواصلة بتتمشي وبتعيط وفجأة طلعت للدور السادس ونطت وقعت وإتوفت بنت لسه حياتها في بدايتها، والسنين قدامها قررت إنها تكتب كلمة النهاية ليها في لحظة عقبال ما حاول رواد المول ينقلها للمستشفى كانت إتوفت
قامت النيابة بالتحفظ على كاميرات المراقبة،
وتفريغها وتم سؤال أقرب صديقة ليها
وإتعرف السبب ورا إللى حصل
الإكتئاب وتضييق أسرتها عليها وإضطهادهم ليها بس كده.
حط قصة “ميار”
جنب قصة الشاب إللي إنتحر من فوق برج القاهرة من فترة بسبب إضطهاد أستاذه في الجامعة، أو البنت إللي رمت نفسها في النيل السنة قبل إللى فاتت بعد خروجها من الكلية،
وغيرهم وغيرهم.
القدرة النفسية لـ أى إنسان عاملة زى سلك الكهربا بيختلف في قوة تحمله من واحد للتاني
سلك قوة تحمله 120 أمبير لو دخل له كهربا قدرتها 240 أمبير هيفرقع وبرده النفس البشرية.
ضغط على ضغط على ضغط لازم يولد إنفجار
وساعتها هيطلع زى ما يطلع بقى
في عصبية في قتل في إنتحار في ضرب،
وساعتها برده محدش هيقدر يمنعه.
راعو نفسيتكم ونفسية غيركم.
بلاش الكلام إللي بيطلع بدون وعى
وبيجرح أكتر من ألف سكينة تلمة.
بلاش التصرفات الصغيرة السخيفة
إللي تبان تافهة بس بـتبان عند غيركم كتير.
الإكتئاب قنبلة موقوتة جوه كل واحد فينا وتحت جلده منتظرة الفرصة عشان تنفجر
بالراحة وتعالوا نخف على نفسنا وعلى بعض.
رجل الأعمال والباحث “ديفيد بيرنز” قال:
(الإكتئاب أسوأ من الإصابة بالسرطان،
مريض السرطان يحيطه كل من حوله بالمحبة؛ المكتئب لأ ).
ربنا يرحم موتانا وموتى المسلمين ويغفر لهم ويرزقهم الجنة.
