وكأني بعيش

بقلم ماجدة البهيدي

عايز تمشي يلا روح أمشي
بس الأول هات أيامي
وأحجب صورتك من أحلامي
رجع رمشي لحضن جفوني
رد لي روحي وقولها كوني
أخنق فيا الشوق وحنيني
شق في قلبى أقطع شرايني
ضيع عمري وأحلى سنيني
هات لي الصبر معاك يصاحبني
علشان يجري العمر قوام
طول الوقت أنا برجع ليك
نفسي بقى أمشي لقدام
وأه معلش
جيب وياك حبة تشكيلة
شوية صبر و راحة بال
ولا تخليش
حاول تلاقى ضحكة عمري
وتجيب منها ولو بريال
وهات لي العمر اللي انا ضيعته
لما انا كنت بدوب في عينيك
هات لي سهري وحيرتي وخوفي
لما انا كنت معاك بداويك
موت نبضي اللي انت ملكته
وحط مكانه حجر صوان
سيح دمي وأروي جناينك
خالي الشوكك في الورد يبان
ابني وعالي خد اللي فاضلي
وحط ما بنا سور وببان
بقى معقولة اللي انا حبيته
واللي كنت انا اهله وبيته
جاي وعايز ننسى زمان
قول وأشجيني كمان كمان
أقتل أملي فيك جوايا
حط لوجعي يلا بداية
ماشي انا هنسى
أنا اللي أستاهل
مهو شيء ساهل
عادي ايه يعني
فيها أيه لما تحطم قلبي
وتقولي ان انت مأزتنيش
فيها أيه لما تخيب ظني
هد الحب كأنه مافيش
حبك ليا ما يلزمنيش
هتعذب حبة و هفوق من الصدمة
وبعد شوية انا هرسم ضحكة
على الخدين وكأني بعيش

الأثنين 2/1/2023
:

ماجدة_البهيدي.

:وكأني بعيش