للشاعر شحاته على ابودرب
عاجل في عز التوهان
صور الشِعر طوفان
فكرة سابتني و راحت
في شهوات مالهاش حدود
هربت باعت العشرة
قلبي كأنه طير مدبوح
محروق دمي و ريحته تفوح
هزيان دخان و النار معدومة
روح مكلومة
دعبست خبايا الكون
عاقل حبة لكن مجنون
مش عارف عاوز ايه
عاوز الفكرة
لكن تيجي بشكل شريف
لكن قلبي ضعيف
و ساعات بشوفه جبان
حضن أمان الشارع واسع
أنا مش راجع
هي بتنده بح الصوت
لكن أنا مش سامع
و ارجع كيف من بعد الموت
حياتي كدبة كبيرة
و دموع العين ناشفين
فكرتي راحت فين
مين زرع البعد ما بيني و بينها
حبيبة قلبي أنا فينها
تعبوا عيوني مش لاقيينها
هجرت شاطئ بحري الهادي
كانت ساكنة حي فؤادي
ملكة وحيدة على مملكتي
عرشها أصبح فاضي
رفعت قضية أمام القاضي
في المحكمة أخرس بينادي
مش سامعينه حضور الجلسة
دار بعيونه بينهم خِلسة
هي لوحدها كانت تفهم
نظرة عينه لمّا تشوفه
ساعة صمته كانت تقراه
صبحت مش فاهماه
مهما اتكلم
قام اتألم
جلدت قلبه
و راحت ماشية
قام شال روحه
من حيها بالعافية
ايوة الفرقة شديدة و قاسية
لكن هو عنده كرامة
عافر ياما عشان يكمل
قلبت حاله عتاب و ملامة
بكى قدامها و اعلن ضعفه
جات من خلفه
طعنت قلبه
طعن ندامة
قال ياحبيبتي الرحمة
لكن رفضت طلبه
قال ياحبيبتي الرحمة
قفلت عينها و ودنها عنه
قال ياحبيبتي الرحمة
رفضت تسمع منه
قال مع الف سلامة
قال مع الف سلامة
قال مع الف سلامة
#شحاته_على_ابودرب
