“قيمة الأشياء على قدر التعب”
فضفضة بدون فصحى
بقلمي: جمال القاضي
يشتكي معظمنا من تعب الوصول لحاجات كتير ، كنا بنحلم ونتمنى تكون من حظنا ، طبعا شيء طبيعي ، بنفتكر كمان ان الحصول على أي شيء بيكون بسهوله ومن غير تعب ، وبتكون السهوله فيه مرغوبه وجميله ،بس الفكره دي والنظرية ال فاكرينها صح هي في الأساس غلط ،
جرب كده بينك وبين نفسك وقارن مدى الغلاوة والقيمة بين شيئين ، واحد حصلت عليه بسهوله ومن غير تعب ، والتاني حصلت عليه بعد تعب ومجهود ومقاتله مع الظروف العنيدة ، أكيد الشيء السهل هو او حاجه مش هتبقى ولا تحرص عليها وممكن تفقدها بسهوله وبرغبتك وبدون مقاومة للتمسك بيها ، وكمان مفيش جواك أي إحساس زعل على فقدانها ، أما الشيء ال قاتلت عليه هو ده ال دايما بتحاول تبقيه في حوذتك وتحس انه غالي عليك ، لأنك تعبت فيه بجد ،
نفس الكلام بالقياس على العلاقات ال بين الناس وبعضها ، لما تحاول تحصل على حب شخص وتفضل تحارب وتحارب علشان توصله ، وبعد مجهود وتعب بتوصله بتحس بنوع من النجاح والإنتصار ال بيزود ثقتك بنفسك ، بتحس كمان بشعور جواك بيقولك المفروض عليك انك تحافظ دايما على الشخص ده ومتحاولش تفرط فيه بأي شكل من الأشكال ، لأن بضياعه وفقدانه كده بتفقد وتفرط في مجهودك وتعبك ، اما لو كانت كل حاجه سهله من البدايه طبعا مابتفرقش إن العلاقه تبقى أو تنتهي ، لأنها ماأخدتش منك أي مجهود تندم عليه في حال الفقدان للعلاقه او ضياعها ،
الكلام ده برضه بينطبق على الأزواج وال لازم يكون مابينهم هو مشاعر من الحب الصادق ال لازم تفضل دايما تقاتل من أجلها ومن أجل الوصول اليها ، والمحافظه عليها بنفس القوة ال كانت في بدايتها ، وأوعى تفتكر علشان حصلت على من تحب يبقى خلاص كده وصلت لهدفك لأن لو كان الوصول للشخص ال بتحبه صعب ، فالأصعب منه هو المحافظه عليه .
علشان كده لازم نعرف إن قيمة الأشياء جوانا أو في نظرنا بيكون على قدر ومقدار التعب في الحصول عليها ، وبالتالي بيكون هناك إما إصرار المحافظة عليها ، أو التهاون والتفريط فيها وضياعها من بين إيدينا .
