بقلم: سناء عاصم هلال
بحبك يا ريس
والغلبان كمان بيحبك
زرعت فينا الامل
في ارض خصبه وبور
وحصنك حماه كل اللي تاه
عشمان في عطفك تحس بيه
طبطب يا ريس علينا
شفناك املنا وحامينا
مر الزمان كاوينا
اسعار يا ريس في الزيادة
وقولنا عادى بلدنا بتشفي
شفت يا ريس علي ايدك
ولسه جروحنا داميه
الفقر يا ريس بيهد فينا
طالبين يا ريس لقمه تكفينا
طالبين يا ريس حيطه تدارينا
عارفين حمولك شايلها كتير
معاك يا ريس بكل نفس
نفديك بروحنا
وكفايه انك حامينا
دى مصر غاليه علينا
يا ريس بطن الشبعان كبرت
مبتفرقش بين شبع وجوع
الفقير نسي الشبع يا ريس
ساكت وصابر ومتعشم
عشان حبك بيتعشم
بيتعشم في يوم جديد
يوم يشهد علي ايدك عيده
عيده بحياه تتعاش
ميحسش انه ببلاش
عايش علي الهامش
ياكل اللي يتبقي من الكروش
طلبه يا ريس بسيط
مطلبش غني ولا سيط
طالب حياه كريمه
لقمه حلوة وحيطه تداريه
ميجيش عليه الليل بهم تقيل
هيصحي ياكل ايه هيشتغل ايه
هيكفي بيته ازاي ويزيد الضغط عليه
هجيب علاج منين كنت كفيت اللي مال
مليون سؤال وسؤال نهايتهم دمعه وسكات
بنحبك يا ريس رغم كل الاسي
بنحبك يا ريس وعارفين انك هتراضينا
راضينا يا ريس وكفي تفكيرنا في بكرة
راضينا يا ريس وخلي الحلم ذكرى
ذكري نفتكرها نضحك عليها
ونقول دا كان زمان
دا السيسي نسانا الاحزان
بنحبك يا ريس
