كتب: عبدالرحمن شاهين
قد يتبادر الي ذهن الكثيرين أننا ضد جماعة ما بعينها ولكن الحقيقية نحن مجرد نافذة لصوت المستضعفين وصوت من لآصوت لهم . السيارة هي حصيلة مشوار كبير قطعة صاحبها يجمع فية النقود من إتجاهات عدة علي أمل أن يستريح ويفضل شراء الزيرو عن المستعمل لينعم بعدة سنوات بعيدا عن الصنايعية ومشاكلهم وإضاعة الوقت والجهد والنقود ولكن سرعان ما تذوب أحلامهم وتنكسر قلوبهم علي أعتاب الوكلاء نحن لآ ننكر أن هناك وكلاء علي أد المسؤلية ولكن نلفت نظرهم الي أن الوكالة ليست أن تأتي بسيارة وتطرحها في السوق بدون أن توفر لها قطع غيار كاملة بمعنى الكلمة ولكن أن يطلب العميل قطعة الغيار وينتظر بالشهور حتي تاتي من الخارج هذا هو مربط الفرس .. العملاء أمانة في أعناق الوكلاء الذين تركوهم في مهب الريح ليستريح كلا منهم علي الجنب اللي يريحه.
الأستاذ عبدالرحمن حسن عبدالله يحكي قصته وكله ألم وحزن ويقول … اشتريت سيارة فيات تيبو اتوماتيك بتاريخ 29 ديسمبر 2021 وبعد مرور 5 شهور ظهرت مشكلة لمبة المحرك ووقتها العربية ماكنتش مشيت غير 3000 كم كلمت التوكيل قالي حملها ع ونش وهات العربية التوكيل عملت زاي ما قلي وحملت ع ونش ع حسابي وروحت التوكيل.
قالولي أن العربية فيها نقص في الزيت وكملوا الزيت الناقص ومشيت، وأول ما وصلت 5000 كيلو قلت اقيس الزيت بتاعها عشان اطمن لقيتو ناقص خالص روحت تاني للتوكيل قالولي عايزة موتور والموتور هايجي كمان 8 شهور وكانوا عايزني استلم العربية واتابع معاهم كل الف كيلو ازود زيت رفضت طلبت منهم ورق يثبت ان العربية عايزة موتور رفضو يطلعو ورق عملت شكوي في حماية المستهلك كلموني بعد الشكوي ف التوكيل قالولي هانعملك عمرة للموتور وهانمنع تسريب الزيت لحد لما الموتور ييجي .
رجعت لحمايه المستهلك قالولي هانبعت الشكوي للإدارة الفنيه ف القاهرة عشان نعمل استبدال للعربية ردو عليا بعد فترة قالولي رفضو العربية تدخل لجنه وقالو الحل انك تعمل عمرة وحمايه المستهلك ما بتعملش حاجة أخدت كلام التوكيل وقالتهولي روحت عملت شكوي ف مجلس الوزراء ردو عليا قالولي حمايه المستهلك ردت علينا ب انك تعمل عمرة ومجلس الوزراء ماعمليش حاجة برضو اخدت كلام حماية المستهلك وبلغهوني بعت للشركة الام بمصر بلغوني مش هانقدر نعملك حاجة طول ما انت عامل شكوي ف جهة قضائية .
يعني ايه عربية زيرو تعمل عمرة والعربية فيها عيب صناعه وفيها خطر ع حياتي بسافر انا والأسرة وانا ذنبي ايه كمستهلك اني استني موتور ييجي بعد 8 شهور ولا اكتر ما التوكيل يستني براحتو العربية ف التوكيل من يوم 3/9 لحد انهاردة شهرين طالبت ورق يثبت ان ليا موتور رفضو طالبت بعربية بديلة امشي بيها لحد لما يصلح اللي عندو رفضو طالبت اني استبدل العربية رفضو.
طب اعمل ايه تاني طيب الوضع اللي انا فيه ما يرضيش ربنا غير السفر وروح وتعالي ومصاريف المفروض ان شركة فيات دي ليها سمعه من زمان كويسة ؟ مش قد العربيات بتجبوها ليه .. العربية ف توكيل ديناميكس الفيات بالإسكندرية من يوم 3/9 لحد الأن وحسبي الله ونعم الوكيل ؟!
