كتب: احمد على
أنتهت بطولة كأس العالم لكرة اليد واللي كانت مقامة على أرض مصر بفوز منتخب “الدانمارك” على منتخب “السويد” في المباراة النهائية بنتيجة 26/24 عشان يحافظ على لقبه اللي أحرزه في البطولة اللي فاتت، وبكده أسدل الستار على واحدة من أنجح بطولات كأس العالم بشهادة الاتحاد الدولي لكرة اليد اللي نشر على موقعه الإلكتروني تقرير عن النسخة 27 من البطولة مصر 2021، وقال إن المستوى في النسخة دي من بين أعلى المستويات في تاريخ البطولة على الرغم من إنها أول بطولة عالمية على الإطلاق في اللعبة تستضيف 32 فريق!..
خلّونا نرجع شوية ورا.. قبل بداية البطولة بأسابيع ويمكن بأيام كمان؛ كان الحل الأسهل والأسلم من وجهة نظر معظم الدول المشاركة إن البطولة تتأجل أو حتى تتلغي خالص.. الخوف من كورونا، وعدم الثقة في نجاح التنظيم خصوصاً إنه لأول مرة البطولة بتقام بمشاركة العدد ده كله من المنتخبات كان عائق مش سهل وعمل شك في إمكانية الوصول بيها لـ بر الأمان..
بس مصر كانت قد التحدي، وكان فيه تصميم إن القصة تكتمل.. متابعة وصول المنتخبات بدقة، والإبهار اللي بدأ من أول لحظة في حفلة الافتتاح، وحضور الرئيس “عبد الفتاح السيسي” له كلها مؤشرات كانت بتقول إن البطولة السنة دي مختلفة.. ولإن الدولة المصرية كلها واقفة وراها هتبقى ناجحة..
1600 ضيف ما بين لاعيبة ومدربين وإدرايين وحكام، وأكتر من 150 صحفي جُم مع منتخبات بلادهم.. الكل كان متشال على الراس، وتم استقبالهم، وضيافتهم كأفضل مايكون، وزي ما كان هيحصل في أى مكان في العالم..
كان الموضوع ماشي بمنتهى النظام زي عقارب الساعة.. رقابة صحية صارمة، ومتابعة أول بأول في كل التفاصيل وبشكل مايعملش ضيق أو حصار على حركة المنتخبات، وتذليل لكل العقبات اللي ممكن تقابل أى حد من البعثات؛ كل ده كان بيحصل بمنتهى السهولة واليسر .. شوفنا منتخبات راحت زارت الأهرامات، وشوفنا عشرات اللعيبة اللي نزلوا على حساباتهم الرسمية على السوشيال ميديا صور من مصر بيشيدوا بالتنظيم والإقامة..
شوفنا كمان إشادة من كل المتابعين سواء ليهم في اللعبة ولا لأ.. مستشار رئيس وزراء اليابان قال: (إن ما حققته مصر من نجاح أثناء كأس العالم لكرة اليد 2021 يعد نموذجا، يحتذى به في إطار الاستعدادات الجارية لاستضافة دورة الألعاب الأوليمبية في طوكيو، خلال الصيف المقبل).. السفير الفرنسي “ستيفان روماتيه” قال: (إن التنظيم الرائع جاء نتيجة عمل طويل وجهود حثيثة من وزير الشباب والرياضة المصري الدكتور أشرف صبحي والاتحاديين المصري والدولي للعبة)، وغيرهم كتير..
بالمناسبة.. منتخب مصر ماكنش بعيد عن العظمة اللي حصلت في المحفل المهم ده.. منتخبنا أثبت إنه عظيم ومحترم وفريق تقيل ومن الكبار.. إحنا لعبنا مع فرقتين النهائي.. في الدور التمهيدي للبطولة لعبنا مع “السويد” وخسرنا بفارق هدف واحد بس 24/23 في مباراة كنا الأقرب للفوز بيها.. وفي مباراة دور الـ 8 لعب منتخبنا مع “الدانمارك” وخسرنا برميات الترجيح 4/3 بعد التعادل في الأشواط الأساسية والإضافية 35/35 بعد مباراة من أقوى المبارايات مش بس في تاريخ مصر لكن في كأس العالم عموماً.. منتخب مصر عمل بطولة قوية على مستوى الأداء وكان ند أكتر من قوى قدام طرفين النهائي..
نجاحنا في تنظيم البطولة هو نجاح للدولة المصرية بكل مؤسساتها وأجهزتها وأفرادها.. نجاح للمصري اللي لما بيشيل المسؤولية بيبقى قدها وقدود، وبيبقى قادر يبهر العالم كله.. مبروك لمصر على كل المستويات.. كسبنا احترام وثقة العالم كمنتخب وكدولة.
تحيا مصر
